辛尼特唔怕反 士氣勁差讓唔起AC

猪拉多纳

俄超冠軍辛尼特今晚喺歐聯C組迎戰AC米蘭，「紅黑軍」今季戰績慘不忍睹，但辛尼特最近爆發內亂，基地仲發生球迷放「詐彈」事件趕走韋素同侯克，家陣隊波成盤散沙，AC有權趁亂搶分，敲受讓平半嘅2.05倍下盤！

（有線61、64、201及204、中央5台周四凌晨0:00直播）

有關AC嘅近況，相信都唔使小妹多講，咪係一個「頹」字囉！佢哋近5仗只得1勝，除咗3場入4球嘅艾沙拉維外，AC球迷應該好難喺依家嘅愛隊身上搵到咩亮點，好彩今仗撞啱辛尼特內訌，憑AC嘅大賽經驗，要保不敗應該唔難。
「侯克韋素唔值呢個價！」

講真，辛尼特嘅歐洲賽戰績一向唔差，近13仗歐洲主場賽事不敗，當中更有10場係勝仗，好衰唔衰佢哋嘅內亂愈整愈大鑊，依家已演變到「死亡恐嚇」添！話說侯克同韋素呢兩位星級外援以超高薪空降後，引起隊中以丹尼素夫為首嘅「本地薑」不滿，除咗有傳呢位隊長要求大幅加薪，佢仲公開批評兩個新兵根本唔值呢個價：「如果佢哋係美斯同恩尼斯達，咁我會明點解佢哋份糧係我哋3倍囉！」
3場不勝「仇外潮」蔓延

咁嘅言論當然搞到班管理層勁不滿啦，結果丹尼素夫同首席射手基沙哥夫雙雙被貶落青年軍，連累辛尼特近3場聯賽不勝。雖然基沙哥夫已經認低威肯坐低傾偈，但呢股「仇外潮」一發不可收拾，依家仲蔓延去到球迷層面，上周有辛尼特Fans喺訓練場放咗個假炸彈，上面貼咗侯克張相同寫上「侯克滾蛋」嘅字句，連擁躉都唔撐，隊內氣氛差到冇人有，除非侯克同韋素真係表現出美斯同「小白」嘅水準啦，否則都幾難搞得掂AC喇。

歐聯C組