皇馬食得招「積」

猪拉多纳

重返勝軌取得4連勝嘅皇馬，今晚喺歐聯D組造訪荷蘭班霸阿積士，憑住較佳實力同兵源優勢，應該唔難大勝一場。最重要係阿積士近年撞親「銀河艦隊」例牌被炒，今場梗係捧2.05倍「讓球客勝」啦！

（有線64及204周四凌晨2:45直播）
4鬥阿積士全勝喪入12粒

皇馬今周惡戰連場，踢完今晚歐聯，周日晚就要火併巴塞，擔心佢哋留力咩？你同皇馬定啦，事關莫連奴一早做好準備，上周日對拉科已經將賓施馬同沙比阿朗素兩大主力收起做後備，兩人只係大約踢咗半粒鐘，抖到足踢今鋪，加上個永不言倦嘅C朗孭飛，就連前足球先生卡卡都重拾佳態，根本係大把籌碼喺手。

反觀阿積士依家只係靠賴恩巴布同保臣呢類過氣球星孭飛，進攻主力蘇利馬尼日前又整親足踝，至少抖兩星期，咪忘記佢哋上周末聯賽惡戰川迪，體力消耗勁大，最慘係力奇發現佢哋對上兩屆喺分組賽先後4鬥皇馬，竟然全部輸晒，最少嗰場都輸2粒，合共失咗12球兼1球都入唔到，擺明畀人恰死，就算有主場之利，都一樣係等炒格。

歐聯D組