皇馬歎阿積士私房菜

猪拉多纳

正所謂不是冤家不聚頭，阿積士今屆歐聯又遇皇家馬德里，兩軍已經連續第三年於歐聯分組賽碰頭，皇馬在過去四次碰頭中全部贏晒，擺明係格食格，其中兩場作客分別贏3比0及4比0，預計今仗入波唔會少，大盤屬不二之選。

（有線64及204台周四凌晨2時45分直播）

皇馬自上輪歐聯擊敗曼城後，士氣信心返晒嚟，已經連贏四場，當中仲射入18球，最重要係王牌C朗「唔開心」事件解決後，已收拾心情踢好波，近四仗攻入5球，都咪話唔得人驚，加上希古恩同賓施馬輪流發威，攻力毋須懷疑。
近兩屆4戰全勝

皇馬主帥莫連奴為了連場大戰，上仗對拉科魯尼亞刻意收起艾比路亞同冇派沙比阿朗素踢正選，並試用莫迪歷打防中，效果都唔錯，甚至連失寵多時的卡卡都獲得解凍，大軍養精蓄銳下，今仗一定狂攻阿積士，務求以一場大勝，為周末作客巴塞的國家打吡造勢。

與皇馬相反，阿積士自歐聯開打後，明顯未適應一周雙賽，表現跌晒Watt，之前作客僅逼和海牙，上仗贏川迪都好辛苦，失去季初銳氣，加上近年對親皇馬都腳軟，近四次對壘輸晒兼一球不入，其中上屆分組賽最後一輪主場面對已提早出線、派副選上陣嘅皇馬，要搶分嘅阿積士都要吞3蛋，今晚相信都係任人魚肉，考慮到皇馬防線仍有不穩之處，首選捧大盤。