奧沙辛拿有飛到舔利

猪拉多纳

近年西甲賽事水平不斷提高，地位直逼英超，除咗名牌球隊巴塞同皇馬啲波好睇，連啲中游分子戰鬥力都好強，其中奧沙辛拿出名主場夠惡，佢哋季初演出一般，但今輪主場對利雲特有飛到，讓到半球個盤好硬淨，一於要上盤。（周一凌晨零時開賽）
法蘭克福夠「弗」追多鋪

奧沙辛拿季初賽績只係麻麻，到依家仲未贏過排包尾，但睇番主場演出，佢哋絕對唔差，對住超級勁旅巴塞隆拿都可以頂到尾段先輸，反映呢隊波主場戰鬥力甚強。利雲特本身作客唔叻，今場莊家開到奧沙辛拿讓半球，顯示班操盤手都秤先主隊，呢隻上盤亦可一試。

德甲球隊法蘭克福季初變身急先鋒搶閘彈出，佢哋人腳唔係好強，但打落好犀利，入波數字高，場場都交到貨，上次對勁旅多蒙特打下風波仍能保住不敗身，真係好順。呢類中型班本身有能力，只要打起信心，可以撐到一段時間，短期內仍然值得跟進。弗賴堡質素同狀態都係一般，作客惡唔出樣！

另外，西甲班霸皇馬主場對拉科，呢個對碰曾幾何時係西甲大戰，依家皇馬級數高好多，但讓到超過兩球真係太多，呢場都係吼下盤，兼顧大盤。