重意甲輕歐霸 玻里立森爭冠

猪拉多纳

今輪意甲重頭戲係聯賽榜三哥森多利亞主場迎戰拿玻里，兩支不敗雄師碰頭，實力稍居下風嘅森多利亞有主場之利，表面睇應該有得踢，但Ali認為喺過去五輪賽事，拿玻里無論攻守表現都遠勝森多利亞，加上主隊今仗陣容嚴重不整，拿玻里小讓平半，上盤係出擊重心。（周日晚9時開賽）
森多利亞痛失4重心

森多利亞今屆回升意甲，踢完5輪保持不敗位居三甲，成績令人驚喜，不過所遇對手包括錫耶納、佩斯卡拉同拖連奴等弱旅，上場作客羅馬，全場捱打，能夠攞番一分，都係多得羅馬門將史基倫堡送禮，整體水準根本唔高，今場陣容仲嚴重不整，首席射手麥斯盧比斯同中場重心人物馬利斯卡雙雙坐波監，中場主力迪桑尼同安德列普利因傷缺陣，痛失4名關鍵球員，戰鬥力嚴重受損。

拿玻里級數明顯較森多利亞高，上仗大勝勁旅拉素賽果令人意外，星級射手卡雲尼連中三元弗到爆燈，教練馬沙利心頭高，決心以祖雲達斯為假想敵，矢志挑戰今屆意甲錦標，事實上球隊亦有呢分潛力。拿玻里周中會喺歐霸盃作客荷蘭對燕豪芬，不過馬沙利已事先張揚，今仗會沿用上仗大勝拉素主力，作客荷蘭反會畀更多機會班副選，擺明重意甲輕歐霸，今仗除守將比圖斯因傷缺陣外，可強陣出擊，Ali相信拿玻里今仗勝望極濃。