拜仁請食魚生粥

猪拉多纳

上季拜仁慕尼黑又係開季踢到曉飛，跟住就失埋好多唔應該失嘅分，卒之將聯賽冠軍寶座拱手讓畀多蒙特。見過鬼怕黑，會長路明尼加日前落咗「柯打」，叫班手足咪再重蹈覆轍，即係話今晚德甲作客都要打沉雲達不來梅，以拜仁嘅強勢要贏冇問題，但考慮到佢哋有歐聯後顧之憂，博3.7倍「讓球和」似乎更好路。

（有線61及64周六晚9:30直播）
會長提醒咪重蹈覆轍

拜仁周中以3球大炒禾夫斯堡之後，會長路明尼加提醒班球員咪開心得太早，強調聯賽仲有29輪，今晚鬥不來梅一定要打醒十二分精神。查實佢老人家又唔使咁緊張嘅，皆因拜仁唔單只走勢好，就連傷兵問題亦開始緩和，上仗傷出嘅查維馬天尼斯同洛賓冇大礙，湯馬士梅拿嘅感冒又好番，大把人畀教練軒歷基斯調配。

嚟緊周三凌晨拜仁會喺歐聯造訪巴迪，軒歷基斯有機會將射手文迪素傑放喺後備，改派德甲史上披甲最多嘅外援比沙路倒戈，甚至畀梳頓沙基利擔正。雖然拜仁未必會出強陣，但主隊不來梅剛啱險勝弗賴堡先終止連續兩場失分嘅頹勢，有地利都唔似會偷到拜仁雞，拜仁小勝相信係最合理戰果。