賀芬咸主Ｗ五星推介

猪拉多纳

德甲賀芬咸主場對奧格斯堡，係黑柴全日出擊重心，賀芬咸近期兩連勝愈戰愈勇，計級數亦遠勝奧格斯堡，加上客軍殘陣態沉，1.73倍賀芬咸主Ｗ係五星推介，進取可以捧埋2.95倍「讓球主勝」。

（周六晚9時30分開賽）

賀芬咸季前積極增兵，兼任體育主管嘅少帥巴布甚至揚言要挑戰歐聯席位，點知起步脫腳，頭3場聯賽全敗勁失11球，經過災難開局後，會方請嚟安祖梅拿擔任體育主管，等巴布專心教練工作，球員亦知所振作，近兩場突然發威，先喺主場以3:1反勝實力同狀態都相當嘅漢諾威，上仗作客更大炒史特加3比0，優質新兵宇佐美貴史同祖斯盧都踢到曉飛，佢哋同當弗嘅法比安莊臣、丹尼爾威廉斯、沙利荷域加埋小將禾蘭，大踢快速一腳互傳，組織流暢悅目，打到史特加全無招架之力，今晚重返主場遇上更弱對手，三連捷機會高唱入雲。
奧格斯堡傷兵滿營

奧格斯堡季前已經預咗係降班膽，仲行緊衰運搞到傷兵滿營，上季護級功臣贊斯、具滋哲繼續養傷，傷兵名單仲包括主力施巴斯坦蘭甘、朗尼菲臘、達華達巴亞、布歷卡、梅蘇拿同摩達斯，冇咗半隊主力當然弱上加弱，打完5輪只得1分包尾，上仗主場對利華古遜半場已失3球，今晚作客遇上當起嘅賀芬咸凶多吉少。