史浩克頹細

猪拉多纳

德甲今晚爆發獨腳戲，由杜塞爾多夫主場恭候史浩克04。咪以為杜塞爾多夫係新升班就好恰，佢哋係目前德甲唯一一支零失球隊伍，今仗面對技高一籌嘅史浩克預計會繼續食老本採取穩守突擊，盛傳爆發內訌嘅史浩克要咬得入杜塞爾多夫有一定難度，1.9倍入球細抵玩。

（有線64及204（3D）、廣東體育周六凌晨2:30直播）
杜塞爾多夫門神上晒身

杜塞爾多夫家陣排喺德甲第5位，5戰過後入得4球鋒力麻麻，但防守力就認真得人驚，至今竟然1球都未失過，門將基爾化肯定居功至偉。呢位利華古遜棄將初出道嗰時因為一次出迎嚴重失誤，被打入冷宮，估唔到今季嚟到杜塞爾多夫就上晒身，大打爭氣波證身價。

除咗守將利維斯、車斗里等幾位球員之外，杜塞爾多夫中、後場戰將嘅德甲經驗都唔算多，但喺主帥美亞領軍之下，呢班手足踢法機動兼整體，實而不華加上跑狗風格係就係冇乜娛樂性，但勝在夠實際吖嘛！
史浩克畀球迷噓士氣差

對家史浩克新季德甲只係輸過1場，論牌面同戰鬥力肯定喺杜塞爾多夫之上。之不過有消息傳出，前仗輸畀拜仁後，中場賀治比同前鋒亨特拉爾黑口黑面向傳媒篤隊友背脊，埋怨攻擊中場達斯拿獨食兼波底曳，今晚佢三個又再喺前場合作，隨時因為有心病影響發揮。

球隊上仗雖然大炒緬恩斯3:0，但成場波踢落查實冇乜霸氣，期間仲畀自己球迷噓到爆，賽後教練史堤芬斯炮轟球迷唔識波激嬲Fans，門將烏拿史杜爾又話Fans嘅噓聲嚴重打擊陣中年輕球員嘅自信，陣營士氣咁一般，畀當頭起嘅杜塞爾多夫守死有乜出奇？
杜塞爾多夫開季6連細

‧計埋德盃在內，杜塞爾多夫新季6戰全細兼0失球。

‧史浩克近5仗入球大細單跳，上場開大。

‧杜塞爾多夫今季德甲5戰有4場開半場0:0波膽。
史浩克留力歐聯好難W

史浩克下周中會喺歐聯B組面對蒙彼利埃，今晚造訪杜塞爾多夫隨時勒住踢。睇番今季戰績，杜塞爾多夫4場「+1」盤都贏晒，咁好路冇理由唔追，1.95倍「讓球主勝」抵玩。