AC缺兩星兼主帥停賽 聖西路冇料到

猪拉多纳

福地變絕地！聖西路今季變成米蘭雙雄夢魘之地，兩班波夾埋喺主場踢咗7場都未贏過，今晚AC米蘭喺聖西路主場迎戰卡利亞里，更要面對主帥阿里基同兩大主力停賽，要讓波梗係捧2.35倍「讓球客勝」啦！

（開賽時間：周四凌晨2:45）

AC家陣立立亂，連同上周末作客以1:2不敵烏甸尼斯，開季至今聯賽4戰只得1勝3負，主帥阿里基備受下台壓力。雖然副會長加利安尼日前重申對阿里基非常信任，但老實講，再係咁失分的話，唔通仲會保住你咩？話晒新進青年軍教頭恩沙基一直對帥位虎視眈眈。
卡利亞里以逸待勞

再者，阿里基因為上場投訴球證，今晚要被罰停賽，如果上訴失敗，就只能夠做座上客，加上上仗被逐嘅中場奇雲保定同守將沙柏達華倫西亞要坐波監，殘陣出擊兼冇晒主場威力，點砌？

當然，卡利亞里今季表現都唔見得好幾多，周日對羅馬之戰因為保安問題取消，最終更被判輸0:3全失3分，雖然不戰而敗係就係幾無辜，但勝在球員以逸待勞出戰，體力點都有多少優勢，力奇唔敢望佢哋全取3分，但保住唔輸都唔係貪心吖！