史特加搶芬博開齋

猪拉多纳

經歷完上星期連場歐聯同歐霸盃後，呢個周中如果無波睇，係咪好唔慣呢？所以今個星期德甲同德乙開快車，尋晚已經撻着引擎先踢八場，今晚仲會繼續，淨係德甲都有五場，夜晚唔慣早瞓嘅都可以邊睇直播邊買吓波。今晚德乙有場哈化柏林主場對特雷斯登，大家都係睇下好喇，而車車重心推介就揀跟住直播嗰場德甲史特加主場對賀芬咸，一於博史特加聯賽贏波開齋。

（有線61及201台周四凌晨２時直播）

史特加開季脫腳，聯賽四場波只得兩和兩負未贏過，佢哋今季因為買咗哈化柏林中場端尼杜倫同史浩克04借將後衞賀蘭，喺「莫財」下被迫放走前鋒舒希巴、中場謝赫特同後衞保拿奴斯，不過伊比斯域、卡卡奧同岡崎慎司等前鋒仍然喺史特加陣中。
4鬥賀芬咸全開「半和」

史特加四場聯賽中，踢得最差就係作客對拜仁慕尼黑嗰場，實力唔夠又冇做好防守，最後咪畀拜仁炒到飛起囉！之後喺歐霸盃主場對羅馬尼亞布加勒斯特星隊都贏唔到，只能和波收場。史特加睇嚟都係要靠今晚對住差唔多水平嘅賀芬咸，先可以贏波重拾士氣喇！

賀芬咸上季表現不過不失，今季喺德甲連輸三場後，上仗竟然喺主場贏漢諾威！不過贏漢諾威唔代表賀芬咸好勁，只係因為漢諾威之前歐霸盃要作客荷甲川迪，班球員未回氣，先至畀賀芬咸偷到雞打開勝利之門啫。其實賀芬咸至今踢咗四場聯賽場場都有失球，可見後防存在幾大問題。再加上往績史特加都係食住對手，近四次主場對賀芬咸取得兩勝兩和，而呢四次對賽竟開足四次「半場和」咁多。所以，今場我除咗會揀主勝外，重會博埋「半場和」囉！