拜仁割「禾」

猪拉多纳

德甲今晚開快車，其中拜仁慕尼黑會喺主場恭候禾夫斯堡，呢隊「一哥」新季6戰全勝強勢沒法擋，個勢猛成咁無謂同佢哋作對，面對畀馬加夫搞到亂晒龍嘅禾夫斯堡，1.5倍「讓球主勝」係就係熱啲，但勝在穩陣吖嘛！

（有線61及201周三凌晨2:00直播）

矢志重奪德甲錦標嘅拜仁一開季就上晒力，即使前鋒馬里奧高美斯復出之日遙遙無期，但克羅地亞新兵文迪蘇傑就交足貨，今戰會倒戈嘅佢暫時已經攻入3個聯賽入球，最重要係隨住查維馬天尼斯以4,000萬歐元加盟之後，一班中場為保正選個個都提起精神，大打爭氣波，舒韋恩史迪加同湯馬士梅拿強勢復甦，但講到最叻仔，必數卻奧斯。
比沙路等破紀錄

計埋上周中場歐聯，卻奧斯已經連續4場有波入，絕對係拜仁新季全勝嘅重要功臣。據《慕尼黑日報》透露，喺歐聯對華倫西亞場波拉傷大腿肌肉嘅列貝利已經復操，今戰有望後備落場。至於喺德甲上陣次數達336次嘅比沙路，只要今晚一落場就會成為德甲史上出場次數最多嘅外援，呢位秘魯前鋒若果有機會後備入替，仲唔搏老命攞彩咩！
馬加夫亂排陣

08至09球季嘅德甲盟主禾夫斯堡，近年陸續將迪斯高、米斯莫域同文迪蘇傑呢啲骨幹賣走，戰鬥力已經今非昔比。呢班波開季嗰時，1至40號波衫都有人着，冗員問題都幾嚴重。最大鑊係教練馬加夫經常去「改造球員」，例如將左閘馬素舒希化推去左翼位置；為咗遷就一對中路守將拿杜同普加迪斯，竟然將中堅嘅卡積亞改造成防守中場，排陣「騎呢」到爆。

「狼堡」新季聯賽4戰僅1勝，上仗鬥新升班嘅格雷特霍夫都要失分，中場大腦迪亞高踢唔番昔日水準，新加盟嘅高大中鋒巴斯杜斯亦明顯接唔到文迪蘇傑棒，球隊對上6次造訪拜仁都輸晒，睇怕今次都係同一命運。