金童王子領軍 小兵攻城開大片

猪拉多纳

今晚英超尾輪有「大」戰上演， 由曼城主場硬撼阿仙奴！呢對宿敵強勢碰頭，要估勝負係難啲，既然兩軍都係進攻型球隊，鋒線又分別有「王子」普多斯基同「金童」阿古路壓陣，入波話咁易， 1.65倍入球大無走雞！

（有線200、204及300、廣東體育周日晚11:00直播）
「藍月亮」兩閘攻叻過守

曼城開季至今，表現絕對唔算失禮，就算周中敗走巴拿貝，其實都只係輸最後3分鐘。呢班波一向全民皆攻，就連雙閘都唔例外，薩巴列達周不時殺入禁區，左閘高拉洛夫嘅重炮亦係「藍月亮」一大殺着，後備嘅基捷基治同馬爾干亦係出擊型翼衞，難怪曼城咁好「火」啦！

當然，針無兩頭利，佢哋嘅主攻踢法需要兩閘助攻，由攻轉守期間難免會暴露防線空位，咁亦解釋到佢哋由社區盾到依家，點解場場賽事都會有失波喇。

阿仙奴上季早早跌出爭標行列，最大原因係法比仔同拿斯尼離隊，又未能及時搵到替補。不過今季雲格終於搵到適合人選，「王子」普多斯基愈踢愈好，近3場入3球，中場辛迪卡索拉更加係世界級指揮官，有呢兩位卡士十足嘅巨星孭起鋒線，要攻破曼城可謂易如反掌。
叛將「出廠投城」變世仇

之但係「小兵」條防線同曼城一樣都有危機，事關一對中堅梅迪薩卡同華美倫都係甩漏多多，面對曼城嘅泰維斯同阿古路，肯定係一大隱憂。講到底，兩軍近年因轉會問題搞到水火不容，艾迪巴約、拿斯尼同基捷基治先後為錢「出廠投城」，季前雲格寧願放尹佩斯入「魔」都唔畀佢去曼城，兩軍仇恨白熱化，今鋪肯定大打出手，唔愁冇入波睇。
球證甸恩「剋」廠仔

‧曼城對上5次聯賽鬥阿仙奴只係入過1球。

‧自05年5月起，阿仙奴未試過連續3場英超作客保持不失。

‧阿仙奴近14次由米奇甸恩執法嘅英超賽事，只錄得1勝6和7負。
張峰來料：曼城（入球大）

今季加盟日之泉JC晨曦的港腳張健峰，擅打左中場及左後衞多個位置，除了罰球有一手，最拿手係推介歐洲足球。