皇馬大舉進攻唔衰得

猪拉多纳

落後8分，唔贏等於投降，華歷簡奴今晚喺西甲主場對皇家馬德里，相信會好唔得閒。因為皇馬已經被死對頭巴塞隆拿拋開，冇可能會再揸流攤，肯定會喪攻博3分，西班牙傳媒更加話，歐聯打破入球荒嘅賓施馬，有機會重返正選陣容，當然要騷哥利幫手開1.45倍入球大！

（now632台周一凌晨3:30直播）

風水輪流轉，賓施馬因為踢歐國盃，歸隊後季初狀態唔夠希古恩好，結果成日要做後備。但日前賓施馬喺歐聯射爆曼城，打破900分鐘球會入球荒成為最終大逆轉贏波功臣，傳媒又捧佢上天，仲話希古恩近4場先後錯過14次入波黃金機會，係皇馬陷入頹勢，聯賽大落後嘅禍根。
華歷簡奴主場交手旺開大

由於希古恩入球效率唔夠高，西班牙傳媒相信，寸王莫連奴會安排賓施馬擔番正，否則再失分畀巴塞甩開，真係邊度都唔使去，相信賓施馬都會把握機會入波，避免長期屈居後備。加上盛傳扭計加人工嘅C朗「開心番」，佢近兩次對華歷簡奴勁入4球，包括上季首循環連中三元，皇馬邊似冇波入？

再講，傳聞皇馬後衞沙治奧拉莫斯同寸王不和，連累「銀河艦隊」好似穿晒窿，開季7場竟然得1場保持清白，沙治奧拉莫斯更喺歐聯被雪藏，即係話，依家皇馬入得又失得，覺得1.2倍客W唔夠肉食，「讓球客勝」又冇把握，1.45倍入球大當然最穩陣，話晒華歷簡奴近5次主場對皇馬都有3次開大嘛！
皇馬交手8連勝

‧華歷簡奴開季4場3次半場打和、1次落後。

‧皇馬近8次對賽全勝。

‧皇馬連續6場開入球單。

‧連盃賽皇馬跨季近9場作客得1次冇失波。
C朗埋門多首球值博

雖然賓施馬呢場有機會打番正選，但講狀態，始終唔及隊友C朗，而且計埋門次數，作為隊中王牌嘅C朗今季埋門43次有16次中目標，期間攻入5球，只要佢控球在腳，冇人可以阻止佢攻門，要開紀錄當然容易得多，玩首名入球首選始終係C朗。