車仔「圍城」老鼠拉龜

猪拉多纳

曾幾何時，史丹福橋球場嘅懾人氣勢，令對手喺更衣室已經腳軟，但有邊個會諗到車路士贏住兩球先，都會畀祖記追和，球員冇得抖又要砌腳腳七注嘅史篤城，分分鐘會畀客軍悶親！

（有線200、300及廣東體育周六晚10:00直播）

國腳如雲嘅車仔，球員係鐵人都要回一回氣，自從喺歐超盃畀馬體會打窒咗之後就未好過，球員又要應付埋踢太公波，搞到愈嚟愈殘。結果依家嘅車仔冇晒傳統英式暴力踢法，單踢技術又輸蝕畀硬橋硬馬嘅對手，尤其砌到完場前，後勁不繼就連實食無黐牙都變甩牙！

史篤城和開有癮已經連和9場，總之穩字當頭，作客史丹福橋球場相信會縮喺自己後半場話唔出就唔出，呢件豬頭骨確實幾惡啃。雙方近幾次對碰都有辦畀大家睇，車仔老鼠拉龜變成入波數字偏低，呢勻睇嚟都冇例外。