史浩克主場考拜仁牌

猪拉多纳

今晚德甲有兩場直播同時上演，當中史浩克04主場對拜仁慕尼黑最受注目，班霸拜仁今季大事擴軍後幾近無堅不摧，至今三線作戰未逢敵手，不過呢場焦點大戰，拜仁將迎來今季最大考驗，皆因史浩克近況亦十分理想，主場出擊矢志做拜仁攔路虎。

（有線61台周六晚9時30分直播）

呢場焦點大戰雙方賽前都喺歐聯報捷，史浩克作客希臘擊敗主場強勁嘅奧林比亞高斯，拜仁則主場擒下西甲華倫西亞，史浩克遠征歸來，但多一日休息時間，喺體能上雙方扯平。雙方都喺歐聯戰場付出一定代價，拜仁國王列貝利拉傷大腿，今仗上陣成疑，至於史浩克亦有當弗嘅鍾斯負傷，射手亨特拉爾患上流感，今仗能否上陣要經過賽前體檢至決定。
焦點大戰敲和局

拜仁級數無疑較高，不過作客向來係德甲班霸弱項，今季聯賽作客只對過升班球隊格雷特霍夫，今仗面臨考驗，呢場波拜仁贏面稍高，但絕對有得打，黑柴認為唔係理想投X場合，勉強要我揀，我寧願小注有3.5倍好分頭嘅和局。

另一場直播賽事漢堡主場對多蒙特（有線64台周六晚9時30分直播），至係黑柴出擊重心，零分嘅漢堡上仗喺雲達華治登場後表現稍有起色，喺人少打人多下作客僅負於法蘭克福，不過球隊傷停問題嚴重，尤其防線兵源短缺，該隊上季主場曾以1比5慘敗於多蒙特腳下，如今防線實力進一步削弱，面對多蒙特難逃一敗，1.4倍多蒙特客Ｗ可作過關重心，進取可以捧埋2.18倍「讓球客勝」。