雷丁防線太曳 西布朗大勝可期

猪拉多纳

唔好以為後衞出身嘅領隊，教波就一定會好保守，好似今季首次擔正嘅西布朗主帥奇勒，就相當注重攻守平衡，雖然該隊今仗防線傷兵滿營，但今仗對手只係任人魚肉、場場有失波嘅雷丁，奇帥可以攻代守揚長避短，主場出擊入波唔會少，捧主勝之餘，大盤亦好路。

（有線304及204台周六晚10時直播）

作為車路士名宿，咁蹺當年奇勒同我一樣都係擔任右閘，風格偏向穩陣。不過，自從擔任助教後，他先後做過古列治、維埃里、雲尼亞里、莫連奴、蘇拿同杜格利殊等名帥嘅副手，耳濡目染下，其執教思路亦變得不再側重防守。做咗副練咁多年，奇勒今季終於擔正執教西布朗，立即將其多年來於各名帥身上學到嘅嘢展示出來。好似今仗咁，西布朗目前陣中傷兵一大籮，其中缺少咗史提芬列特同哥蘭波波夫，令防線變得唔太穩陣。前鋒線雖有射手奧丹維治停賽，幸好仲有「小魔獸」盧卡古做開路先鋒，配合另一狀態極弗嘅箭頭沙恩朗，火力一啲唔嘢小。
開季4仗失10球

更重要係對手雷丁開季4仗失咗10球，條防線真係曳到唔使恨，西布朗橫掂後防唔係咁穩，倒不如玩喪攻更加實際，因此呢場細鬼捧主勝之餘，亦會兼顧埋大盤。