熱刺落足料砌拉素

猪拉多纳

睇意大利波，睇歐霸盃啦！意甲今季冇電視台肯直播，不過各位「意粉」唔使失望，大家可以喺歐霸盃睇到幾支意大利球隊演出，國際米蘭、拿玻里、拉素同烏甸尼斯等球隊都會於歐霸盃分組賽炮製意國Pizza畀大家歎。今晚首輪重頭戲當數J組英超大軍熱刺主場對意甲老牌球會拉素，熱刺教頭保亞斯成日畀人拎嚟同舊帥夏利列納比較，勁想出番啖氣，老列納上屆盡遣後備棄歐霸盃，保亞斯偏要強陣爭盃，面子攸關，首度出擊不容有失，熱捧主勝！

（有線64及204台周五凌晨3時05分直播）
保亞斯勢立威

保亞斯取代夏利列納領軍，初上任已面對極大壓力，外界經常比較兩人，熱刺季初陷入低潮，甚至有粉絲要求夏利列納回歸，令保帥勁冇癮。保亞斯決心走出陰影，第一步就喺歐霸盃做起，賽前講明唔會好似老列納上屆咁留力，將會精銳盡出搏殺。呢位少帥喺10/11賽季率領波圖捧走歐霸盃響朵，當然想喺成名賽場再威過啦！

熱刺兵力唔算好強，現時更有中場柏加、守將伊高圖及卡保奧等主力養傷，不過大軍剛於聯賽打開勝利之門，對士氣有一定幫助，今戰中鋒艾迪巴約勢將擔正攻堅，兩大新兵迪比利及丹普西都有機會披甲，法國門神洛里斯就會把守最後一關，人腳甚強，獨忌要由右閘基爾洛頓串演左閘，攻守都會曳啲，但影響唔算好大。
意兵唔吼歐霸

另一邊廂拉素開季聯賽連歐霸盃五戰全勝，但對手多屬普通料，唔好睇得太高。拉素兩大進攻重心靴蘭尼斯同高路斯季初都好弗，但意甲球隊以往唔多認真對待歐霸盃，相比起熱刺明刀明槍，點計都差啲，今場主勝賠率低至1.65倍，熱刺足足要讓半一，個盤勁硬淨，飛數對辦，值得捧場！