廣州踢守細波 伊蒂哈德隊長喪兄冇火

猪拉多纳

亞冠盃8強首回合終於開打，沙特班霸伊蒂哈德今晚喺主場對中超冠軍FC廣州，撞啱伊蒂哈德隊長穆罕默德羅亞因為兄長突然過身，可能要奔喪錯過今場賽事，火力難免大減，撞啱FC廣州陣容不整，教頭納比又鍾意守多過攻，一於玩1.65倍入球鈿。（now671台、廣東體育及中央5台周四凌晨1:35直播）

伊蒂哈德喺16強以3:0解決柏斯波利斯，但其實迎接8強前進行過大換血，班外援幾乎換過晒，真正打硬仗未必惡得出樣，特別係佢哋嘅隊長穆罕默德羅亞，近日經歷喪兄之痛，隨時要缺席呢場大戰。
FC廣州3場冇失波

另一方面，FC廣州首先有中場趙旭日及後衞張琳芃停賽肯定缺陣，中場趙源熙同左閘孫祥因傷唔踢得，要知道曾經帶領意大利奪得世盃冠軍嘅納比，為人最識計數，呢個時候佢唔會希罕大勝，心裏面肯定諗緊點樣至可以穩陣晉級，避免再有球員受傷，駁火機會好低。

事實上，最近FC廣州已連續兩場聯賽冇波入，同時又連續3場冇失波，「納比式」風格已經明顯成型。最重要係，納比可能受到球會壓力，選擇將外援名額畀剛啱傷愈嘅巴拉圭射手巴里奧斯，反而冇幫弗得多嘅巴西前鋒克萊奧註冊，相信會直接拖低恒大嘅火力。