曼聯唔衰得 見過鬼怕黑強陣掃「雷」

猪拉多纳

見過鬼都怕黑，曼聯上屆歐聯分組賽出局，費格遜為免重蹈覆轍，賽前已強調今仗會精銳盡出，今晚夫添喺H組誓劏土超冠軍加拉塔沙雷攞彩，1.72倍「讓主」熱都要捧！（有線64及204周四凌晨2:45直播）

曼聯上屆喺歐聯分組賽開壞個頭連環失分，卒之小組排第3出局，費Sir當然係耿耿於懷，前日受訪時就話若果歷史重演，肯定會畀人笑到面黃，所以實牙實齒話會派強陣。上仗4:0大炒韋根場波休戰嘅路爾斯華倫西亞、香川真司同埋後備落場嘅尹佩斯，預計會復任正選，就連左閘艾拉都趕及傷愈，鬥心同人腳都唔使懷疑。
加拉塔沙雷射手打柴

作客嘅加拉塔沙雷喺剛過去嘅聯賽以4:0大炒安塔萊亞，不過瑞典箭頭艾文達就打咗柴，今仗上陣機會只係五五波。除此之外，捷克鐵衞烏化奴斯亦都因為韌帶受創要抖4至5個月，門將梅斯利拿就出名係神經刀，難怪新季响土超4戰過後已經失咗6球。

19年前，加拉塔沙雷曾經喺歐聯次圈踢過曼聯出局，當時領軍嘅正正係現任教頭泰林，去季第二度回巢嘅佢賽前就話想重溫好夢，不過以加拉塔沙雷嘅二線班底，加埋歷來喺歐聯戰場造訪英超隊伍都未贏過嘅數據，今鋪真係睇唔出有乜本錢爆冷。

歐聯H組
加拉塔沙雷訪英例出事

‧曼聯近12場歐聯場場入波。

‧雙方歷來歐戰交手曼聯不敗，錄1勝3和。

‧加拉塔沙雷從未喺歐戰作客擊敗英格蘭球隊，僅得3和4負。
紅魔慢熱冷敲3.7倍「和主」

曼聯新季表現慢熱，即使面對修咸頓同韋根兩支弱旅都係下半場先至嚟料。加拉塔沙雷教頭泰林老謀深算，賽前話考慮出單箭頭，想玩穩守突擊，預計紅魔都要花啲時間先咬得入，「和主」有3.7倍博得過吖！