拜仁大勇 新兵對辦玩轉華倫

猪拉多纳

今晚安聯球場上演矚目歐聯F組大戰，由拜仁主場迎戰華倫，主隊喺上屆決賽佔盡優勢，結果眼白白睇住車路士高舉大耳盃，真係百般滋味在心頭！今屆拜仁喺主場展開歐聯之路，一於捧1.97倍「讓主」支持主隊全取3分。（有線63及203周四凌晨2:45直播）

歐聯獎金吸引係人都知，所以要掘金一定要有穩定演出，拜仁喺近年出戰歐聯當然稱得上穩定喇，佢哋經常殺到入四強甚至決賽，只可惜未能染指冠軍。佢哋新季夠晒搶鏡，近兩場共入9球，新加盟射手文迪蘇傑更踢到着晒火，登陸後連續5場有入波破埋球會紀錄，另一名新兵梳頓沙基利表現都相當可人，佢兩個來投亦為馬里奧高美斯、洛賓同列貝利帶嚟正面嘅競爭衝擊，進一步加強板櫈深度，應付多條戰線都冇問題啦！
華倫新季場場失波

華倫西亞開季表現亦唔失禮，先係作客逼和皇馬，去到魯營亦只係僅負一球，較為失色係場場都有失波，對住狀態大勇嘅拜仁攻擊球員，要保不失係一件難事。論人腳，華倫不乏好手，只不過要喺歐聯創一番事業嘅可能性實在唔大，今晚作客對住氣勢如虹嘅拜仁，情況一啲都唔樂觀。

歐聯F組

張峰來料：拜仁（讓球主勝）