曼城唔驚皇馬 銀河艦隊沉淪防守差

猪拉多纳

球迷等咗咁耐，今屆歐聯分組賽正式殺到！託抽籤嘅「鴻福」，今晚一嚟就有場「決賽級」大戰，「死亡D組」率先上演西甲冠軍皇家馬德里主場鬥英超王者曼城。曼城經歷上屆分組賽出局教訓，今屆表現肯定有所改善，消息話連阿古路都有望復出，曼城大打擅長嘅反擊戰，小弟力撐「讓球客勝」。

（有線61及201、中央5台周三凌晨2:45直播）
文仙尼喪簽守將打穩陣波

曼城自從捧走英超冠軍後，球員心態，以至全隊氣勢同定位都唔同晒，今屆唔會再當自己係歐聯新丁。上屆曼城喺分組賽出局嘅死因，主要係作客唔掂，所以預料文仙尼今屆會以穩陣波為先；而佢喺轉會市場關門前，連掃馬爾干、查維加西亞同拿斯達錫等後衞腳，明顯係為呢啲作客硬仗鋪路，而且上場英超對史篤城嗰陣留晒力，睇怕皇馬唔易咬得入佢哋。

今場波另一個焦點肯定係巴洛迪利，呢位意大利前鋒喺國際米蘭出道嗰陣，已多次同當時國米主帥莫連奴有摩擦，巴洛迪利做完眼部手術後，上場經已復出，今場好大機會繼續擔正同寸王重逢，而且曼城王牌阿古路今場亦有望及時復出，大大加強球隊嘅反擊力。
傳皇馬變陣莫迪歷 艾辛擔正

主隊皇馬今季開局麻麻，C朗跳草裙舞一事雖然已經解決，但唔多唔少都會影響球隊備戰。何況最大問題係後防人腳不足，卡維奴已經被踢入雪櫃，法比奧干查奧亦經常甩漏，賽前又傳艾比路亞足踝有事，或者要搵艾辛頂檔，真係多事到爆。佢哋上場「夫添」對西維爾搏到盡都要輸波，士氣大受打擊，《阿斯報》尋晚仲話，「寸王」嬲嬲哋想用新兵莫迪歷代替奧斯爾响中場發辦添，咁多變動，今晚即使有主場之利都係咁話，「讓球客勝」可以一博！
頂占筍盤：曼城（讓球客勝）

有線球彩台主持阿占

電郵：soccer64@cabletv.com.hk

PHONE波熱線：1831 678

「球彩俱樂部」開放時間：周二晚10:30至晚11:30
皇馬鬥英格蘭波冇着數

‧皇馬於歐洲賽事主場11次對住英格蘭球隊，僅獲5勝4和2負。

‧C朗効力曼聯期間，於打吡戰11次對曼城，取得7勝1和3負。

‧皇馬上屆歐聯6場主場賽事全勝，總共入咗24球。
乜都玩錦囊：「小煙槍」主場猛料博首球

有跟開曼城比賽嘅巴打，都知文仙尼一向作風保守，今場肯定先求穩守。不過曼城新季5場波場場有失波，就算今晚有能力攞1分走都未必保得住清白之身。皇馬射手希古恩新季3次主場出擊都有波入，玩首入梗係吼實呢支「小煙槍」啦！

歐聯D組