愛華頓爛仔收素

猪拉多纳

「喜鵲」變「跛雀」！防線主力變晒十字軍，前鋒又鬧入球荒，幾乎跛咗半隊嘅紐卡素今晚喺英超作客愛華頓，要知道「拖肥糖」已經累積跨季主場6連勝，班爛仔打手最鍾意喺地頭用殺傷戰術蝦蝦霸霸，紐記怕且凶多吉少，一於捧1.67倍主勝啦！

（有線200、300及廣東體育周二凌晨3:00直播）
紐卡素成條防線主力傷晒

開咧戰贏完熱刺後連續2場失分嘅紐卡素，本來傷兵已經唔少，點知國際賽期後仲大鑊，家陣成條防線既有門將告魯爾、中堅隊長高洛仙尼、左閘賴恩泰萊同右閘丹尼森遜打晒柴，防中迪奧迪又未出得，條防線大執位，大門仲要由久疏戰陣嘅夏柏把守，咪話唔得人驚。

咁都未算衰，上季踢到曉飛嘅柏比斯施斯，今季跌Watt未開齋，艾美奧比又有傷在身，入波要靠中場賓艾化同缺態嘅丹巴巴亞，實在信唔過。咪忘記紐記領隊柏杜仲要繼續停賽，臨場有乜依郁都應變唔切啦！
愛華頓主場跨季6連勝

相反，愛華頓除咗件愛爾蘭國腳吉遜因傷缺陣，以及新兵白賴仁奧維度未搞掂工作證外，其餘眾將都可以候命，及時傷愈嘅派拿應該會披甲校炮，「全能天王」費蘭尼雖然扭計，但據講莫耶斯已同佢傾掂數，准佢喺1月走人，照計「爆炸頭」點都會搏命，等班有錢佬買佢啩！

更令力奇放心支持主隊，係「拖肥糖」喺主場原來已經跨季連贏6場，共入19球僅失1球！事實上，愛華頓踢慣爛仔殺傷戰術，主場出擊，球證點敢亂吹佢哋犯規吖，強如曼聯都要喪師葛迪遜公園球場，就知呢班打手幾咁恐怖啦！睇埋往績，「拖肥糖」近9次喺英超主場鬥紐記，係錄得6勝2和1負優勢，今晚要再贏一場有幾難呀？
喜鵲作客唔識飛

‧愛華頓近6次主場對紐卡素取得4勝1和1負。

‧連同所有賽事，愛華頓近7次主場全勝，當中5場淨勝對手，其餘2場只失1球。

‧紐卡素近6客戰僅得2和4負，當中包括以1:3輸畀愛華頓。
拖肥愛派蛋 2:0、3:0抵玩

愛華頓開咧頭2場先後擊敗曼聯同阿士東維拉，雖然啱啱作客輸咗畀西布朗，但今次回師主場對住紐卡素，以愛華頓喺主場鍾意派蛋嘅性格，7倍「2:0」及13倍「3:0」波膽值博。