費倫天拿新軍上坦途

猪拉多纳

今晚8場意甲，Ali首選場次係費倫天拿主場鬥卡坦尼亞，雖然無論上季同今季截至目前成績，卡坦尼亞排名都在費倫天拿之上，上季聯賽兩度交鋒，卡坦尼亞亦取得一勝一和。不過Ali深信費倫天拿今季換上優質少帥蒙迪拿領軍，成績必定會有大幅進步，今晚主場有力出番啖氣，撐1.75倍主Ｗ。（周日晚9時開賽）

今場比賽最受注目嘅，係費倫天拿新帥蒙迪拿倒戈對上季舊主，蒙迪拿係Ali心儀少帥，勤奮之餘腦袋亦充滿新思維，而且深獲球員愛戴。費倫天拿喺今夏增兵工作亦做得出色，新加盟嘅門將維維安奴、中場大衞比沙路、米利亞斯奧、保查華利路同阿古蘭尼足以大大提升球隊戰鬥力，佢哋聯賽首戰就擊敗實力相當嘅烏甸尼斯，上仗作客拿玻里雖然輸1比2，但形勢唔比對手差，喺惡劣場地上作戰，令佢哋錯失多次入球良機，我認為上仗佢哋應該攞番1分至合理。

費倫天拿近期將主力守將拿斯達錫賣咗畀曼城，但會方正努力研究增兵補充，今場費倫有阿古蘭尼因傷缺陣，前線艾咸達奧亦上陣成疑，不過Ali認為由塞爾維亞攻擊手拿積配合星級箭頭祖維迪合作嘅鋒線，喺主場一樣有強勁威力。
卡坦尼亞唔變益咗蒙帥

卡坦尼亞喺失去蒙迪拿後，由新帥馬蘭領軍，先作客賽和羅馬，再主場擊敗熱拿亞，成績比預期更好，馬蘭最聰明之處係盡可能唔改變蒙迪拿嘅用人同戰術，不過正因為咁，會更方便知清卡坦尼亞底細嘅蒙迪拿作出針對性部署。卡坦尼亞本身冇球星，着重整體戰，從首兩仗表現所見精神面貌相當好，但兩仗失4球防線級數始終較差，而且作客係弱項，上季聯賽作客僅兩勝，失球數字僅比三支降班隊伍少，今晚面對費倫新軍機會難樂觀。
Ali 推介：

費倫天拿勝 ★★★★

羅馬大 ★★★★

國際米蘭上盤 ★★★