熱刺盞畀雷劈

猪拉多纳

英超名牌球隊熱刺開季三戰不勝，今輪作客升班馬雷丁，勁多人追佢哋開齋，不過，熱刺改由保亞斯領軍後唔多對辦，換血後新舊球員需時再夾，依家踢唔番上季水準，仲有中場重心柏加缺陣，作客讓波好牙煙，要「讓球主勝」！（有線300台及200台周日晚11時直播）
大換血拖累攻守

熱刺踢走老帥夏利列納，改由少帥保亞斯領軍，已引起隊內唔少球員不滿。保帥上任後積極增兵重組球隊，先後引入中堅維頓漢、中場基菲爾施古臣、迪比利同丹普西等，同時簽番射手艾迪巴約，一眾新兵都有質素，長遠睇啱使。不過，保亞斯同時放走兩大星級中場莫迪歷及雲達華治，熱刺近季靠呢兩位仁兄造波，一次過放走兩個指揮官，想唔亂都幾難，球隊頭幾場聯賽踢落唔多流暢，問題已浮現。

與此同時，保亞斯亦唔擅於處理球員問題，啱啱簽下法國門神洛里斯，轉頭高調話費度仍然係首席門神，令洛里斯未落場已經冇晒癮，嚴重破壞隊內氣氛！熱刺經過開季聯賽三戰不勝後，唔少球迷質疑保亞斯領軍能力，甚至有人叫佢下台！大軍陷入低潮，但球員唔多肉緊，頭三場聯賽都喺尾段失波，近兩仗主場贏住都畀人追番，一次半次就話集中力不足啫，依家一次又一次出事，唔通班友有心逼走阿頭？
雷丁擋車贏口碑

另一邊廂雷丁星級球員唔多，得射手普格恩耶克較具名氣，呢個俄羅斯前鋒有名有實，喺前線幾乎一個打晒，停到波又射到波，相當叻仔！雷丁聯賽兩戰一和一負未贏過，作客二比四不敵車路士一戰輸波贏口碑，成班兵陣上不斷走動逼搶對手，效率頗高，反擊亦有威脅，踢落有紋有路，今次喺主場出擊繼續逼住熱刺踢，趁對手信心不足甩漏多，絕對有條件偷雞，受讓相當有利，「讓球主勝」有計！
和波急落飛

今仗歐洲多間菠菜公司喺昨日均突然調低和波賠率，其中以威廉希爾跌幅最大，由初盤3.4倍調低至3.1倍，立博亦由3.5倍跌到3.2倍，跌咁多個水位，有啲唔尋常。