車仔冇油鍊唔贏QPR

猪拉多纳

今晚英超除咗「雙城記」，仲有場西倫敦打吡，昆士柏流浪主場鬥車路士。車仔A高同泰利「因傷」缺席太公波後已復操，今戰有望趕及上陣，不過車仔咁多國腳啱啱歸隊，未必回得切氣，而且泰利種族歧視安頓費迪南單嘢仲未搞掂，昆士柏靠啖氣頂得住車仔唔奇，要受讓嘅1.97倍「讓球主勝」。

（有線202及302周六晚10:00直播）
全場焦點：安頓鬥泰利

車路士陣中國腳眾多，費蘭度托利斯、夏薩特、伊雲洛域等多名主力球員都要踢國際賽，返球會報到後未必有足夠時間調整，今戰演出隨時走樣。仲有，泰利上季對昆士柏嗰陣「出口術」侮辱安頓費迪南，遲吓佢要就事件接受聆訊，睇吓足總點處分，所以今戰焦點除咗佢哋會唔會握手，仲有係班QPR球迷點樣噓爆泰利。

講真，昆士柏3戰只得1分，對買咗咁多人嘅佢哋嚟講梗係唔收貨啦。不過正因為陣容變動太大，所以需時磨合，相信領隊曉士經過幾場聯賽同趁住國際賽期已執正隊波，今戰絕對有力同車仔周旋。