尼斯進步主場贏比你睇

猪拉多纳

今晚Macot分析重心轉戰法甲，同大家研究尼斯主場迎戰比斯特，雖然比斯特經過4場聯賽後得分比尼斯多3分，但我認為兩軍得分同排名不足以反映實力差距，比斯特喺Macot心目中只係護級分子，今場作客唔夠尼斯砌，推介1.8倍主Ｗ。

（周日凌晨2時開賽）
比斯特作客腳軟

尼斯今季仲未開齋，球隊難免喺壓力下作戰，不過Macot睇到佢哋表現一路都有進步，呢隊波論名氣同球迷基礎都只係法甲中游，不過我認為佢哋擁有相當穩定有力嘅陣容，4戰只得3分當然唔算理想，不過從另一角度睇，近3仗能夠喺有相當實力嘅對手面前保持不敗，分別作客和過出名主場好嘅華倫西恩斯同不敗之師波爾多，主場亦逼和勁旅里爾，表現確有進步，現時球隊陣容整齊，今仗難得主場遇弱旅，必趁機全力爭取打開勝利之門。

比斯特今季開咧後表現比預期好，不過Macot堅信佢哋唔可以維持強勢到季尾，而且佢哋兩場勝仗都喺主場，所贏嘅亦只係弱旅伊維恩同特魯瓦，作客兩戰全敗兼未入過波，其中對聖伊天慘敗更顯露級數不足。我相信尼斯喺主場可以順利打開今季聯賽勝利之門。

此外Macot今晚會用曼城客Ｗ做過關重心，雖然今仗有阿古路、巴利同巴洛迪利等主力唔出得，但佢哋板櫈深度始終係英超最強，我認為以泰維斯同迪斯高領導嘅鋒線入球能力依然值得信賴；史篤城過去主場面對曼城成績好，今季主場亦和過阿仙奴，但呢班波攻力太弱級數亦有別，難阻曼城全取3分。
Macot推介：

曼城勝★★★★★

尼斯勝★★★★

燦美爾勝★★★