皇馬客W擺幾維 氹掂C朗順便慶功

猪拉多纳

經過國際賽期後，今晚西甲重燃戰火，其中壓軸戰西維爾主場對皇家馬德里值得留意。C朗之前一句唔開心，搞到話要離開皇馬，好彩事件已告平息，呢位葡萄牙球星亦可專心替「銀河艦隊」打江山，作客西維爾可謂不勝無歸，客勝有計。

（now 632周日凌晨4時直播）

國際賽後，莫連奴同C朗終於傾掂數，尋日球會影大合照時，仲攞起寫住「馬德里人」嘅圍巾表忠心，姑勿論C朗因乜事會話於皇馬唔開心，他在「銀河艦隊」的重要性毋庸置疑，而且佢更係西維爾剋星，過去兩季皇馬作客西軍都血洗6比2，而C朗更轟入7球，如今佢收拾心情，實在係皇馬之福。另一好消息係上季收入為5億1400萬歐元（約51億4400萬港元），破球會紀錄。
西維爾遇皇馬腳軟

除搞掂C朗之外，最幸運係皇馬唔係太受FIFA病毒影響，陣中只有葡國左閘法比奧干查奧停賽，其餘戰將均可悉數披甲，而阿根廷前鋒希古恩頭3場聯賽場場有波入，勒都勒唔住。對手西維爾開季表現麻麻，該隊太倚靠箭頭尼格度入波，目標太大容易防範，上仗作客華歷簡奴兩度獲得12碼，點知尼格度同拿傑迪錫先後宴客，證明信心出現問題，加上近年對親皇馬都腳軟，主場出戰亦信唔過，客勝仲有1.5倍值得捧場。