殘獅「烏」雲蓋頂

猪拉多纳

2014世盃外圍賽歐洲區大戰爆發，英格蘭今晚喺H組主場再遇冤家烏克蘭，讓波要唔過。原本英格蘭已經陣容殘缺，依家連泰利都傷埋，呢隻「殘獅」連二隊都稱唔上，對家烏克蘭喺歐國盃分組賽以東道主身份羞家出局，關鍵戰就係輸畀英格蘭，呢個仇點會咁快唔記得，「讓球客勝」抵撐！

（now100及632台周三凌晨3:00直播）

淨係計王牌朗尼、中場艾舒利楊格、柏加、巴利、後衞泰利同艾殊利高爾因傷唔踢得，英格蘭已經有半隊正選打柴，點知領隊鶴臣諗住重用嘅中鋒安祖卡路爾同中場菲爾鍾斯都要養傷，呢場英軍其實得隊長謝拉特、中場林柏特同門將赫特係慣常正選，即使首場分組賽以5蛋炒起魚腩摩爾多瓦，都咪以為好叻。

三獅兵「雙特」跌Watt靠唔住

其實有睇英超應該都感覺到，年紀唔細嘅「雙特」開季表現唔係幾掂，大炒摩爾多瓦場波中場湯卡華利被捧上天，當地傳媒話佢可以成為英格蘭嘅法比加斯，個人覺得得啖笑，總之呢場英格蘭以殘陣出擊，就算領隊鶴臣用二打六球員比較得心應手，睇落都唔似贏到波咁把炮。
烏克蘭要報歐國盃之仇

唔好忘記，烏克蘭同英格蘭勁多牙齒印，歐國盃分組賽輸波，更加係球證發雞盲冇判入波畀佢哋至輸，即使兩大前線王牌舒夫真高同禾路連已淡出國家隊，相對上烏克蘭陣容始終完整得多，淨係大部分球員來自基輔戴拿模同薩克達，士氣同默契都贏晒，加埋教頭布洛堅決心報仇，戰意搭夠受讓抵玩。
英格蘭近戰旺開單

‧英格蘭近5場開4次入球單。

‧烏克蘭連開4場半場和。

‧連續5次對賽開半場入球細。
烏克蘭守強攻弱博半場和

烏克蘭雖然喺歐國盃分組賽出局，但佢哋近8戰有6場都可以喺半場保持不失，今晚大有可能頂得住缺少朗尼同安祖卡路爾等射手嘅英格蘭。只可惜烏克蘭嘅火力非常唔掂，除咗舒夫真高喺歐國盃分組賽對瑞典梅開二度，近5場有4場都入唔到波，難怪連續4場開出半場0:0！就算英格蘭今晚有中堅泰利唔踢得，烏克蘭都難望破到門，2.22倍嘅半場和，同埋2.35倍嘅半場0:0波膽都捧得過。