日本讓球勝食得開胃

猪拉多纳

今日有好多場世盃外圍賽，其中亞洲區B組就有日本打頭陣，坐鎮主場對褪色勁旅伊拉克。客軍自07年奪得亞洲盃後無甚佳作，加上近況麻麻，作客唔係日本對手，一於邊食晚飯邊捧「讓球主勝」，隨時愈食愈開胃。

（now 671周二晚6時30分直播）

日本自從由意籍老帥沙哲朗尼執教後，不但善用東瀛兵腳法細膩的特點，仲加強前場壓迫性打法，令該隊較多時間控球在腳，掩飾唔算穩陣嘅防線。

日本今仗雖有內田篤人、今野泰奉及栗原勇藏因停賽未有入選，但仍有夏雲拿、本田圭佑、香川真司等外流球員歸隊，加上國米左閘長友佑都可趕及復出，可謂星光熠熠。効力維迪斯嘅前鋒夏雲拿，上仗同阿聯酋拍跳時一箭定江山，狀態唔錯，相反伊拉克已不復當年勇，於B組頭兩場和晒，而且不擅作客，近六仗作客僅嘗一勝，只靠07年亞洲盃神射手尤尼斯單天保至尊蛇都死喇，呢場日本不勝無歸，「讓球主勝」捧得過。

伊朗作客黎巴嫩吼細

至於A組則有黎巴嫩主場對伊朗，兩支球隊實力有一定差距，往績上伊朗亦佔得上風。不過伊朗今場要作客，球員未必會搏得太盡，建議選擇細盤。

（now 670周二晚上10時直播）