C朗頹爆 葡萄牙細火煲疆

猪拉多纳

世界盃外圍賽歐洲區F組，葡萄牙成也C朗、敗也C朗，佢近期同皇馬陷入冷戰，搞到悶悶不樂，仲影響埋球場表現，上仗作客弱隊盧森堡，兩次單刀失機，幾乎連累球隊失分。C朗「心病」一日未愈，葡萄牙都存在隱憂，今晚回師主場對表現硬淨嘅阿塞拜疆，寧要入球細。

（有線155台周三凌晨3時15分直播）

眾所周知，葡萄牙已成為C朗「一人球隊」，佢表現好壞直接決定球隊命運，上仗只能小勝世界排名106位嘅盧森堡2比1，好大程度上因為C朗失準。佢有兩次單刀唔入，其中一次仲係重演巴洛迪利喺歐國盃「慢步單刀」，白白浪費入球良機。C朗罕有出現神不守舍，似乎受到近期扭計加薪失敗傳聞影響，問題未解決之前，恐怕難以專心比賽。
阿塞拜疆死守求和

阿塞拜疆球員技術水平當然唔能夠同葡萄牙相提並論，但可以拚勁搭夠，上仗面對級數高一班嘅以色列都佔得上風，埋門次數遠比對手多。不過，今仗到訪葡萄牙，預料阿塞拜疆會加強防守博攞一分，就算最終輸波亦唔會大敗，入球細值得一博。