法國強細主戰白俄

猪拉多纳

法國守強攻弱，好難大炒對手，入波唔會多！世界盃歐洲區I組外圍賽，「法蘭西兵團」主場鬥白俄羅斯，計牌面當然高對手兩班，但新帥迪甘斯繼承球隊保守傳統，陰啲陰啲贏一球就算；加上射手賓施馬不在狀態，細盤有賠率筍爆！

（now 714周三凌晨3時直播）

正所謂「性格決定命運」，一隊波點踢法，當然影響球賽結果。將法國球員逐個秤，可以話粒粒皆星，絕對踢得出進攻足球。但近年「法蘭西兵團」目標為本，大打穩陣足球，普遍以451陣式迎敵，由歐國盃決賽周計起，近六場全部開細。今仗縱有主場之利，白俄實力又唔強，但迪甘斯初掌國家隊帥印，唔會貿然改變踢法。

上仗鬥芬蘭，法國缺少拿斯尼、賓艾化下，靠晒賓施馬同列貝利進攻，最後小勝一粒，戰果在預計之內。上仗入波嘅戴亞比有輕傷在身，法國要大勝機會好微，相信都係贏一球兩球收工。
法國近6戰全細

白俄羅斯以國內班霸巴迪球員為骨幹，硬淨有餘技術不足，近年進步亦唔多，攻力不濟係球隊弱點。2012歐國盃外圍賽，白俄亦係同法國同組，兩次對賽都開細，今仗唔會例外。