巴西大炒格

猪拉多纳

記得2002年日韓世盃，巴西以4:0摧毀由「神奇教練」米路天奴域帶領嘅國足，聽朝巴西喺熱身賽主場再遇國足，「-2」照追「讓球主勝」，原因係國足有大批「逃兵」得17個球員用，實力唔夠戰意欠奉點頂？

（中央5台周二早上9:00直播）
鄭智 孫祥鬥完瑞典返國

相比起國足山長水遠去比賽，巴西早兩日喺熱身賽以1:0砌低南非，大軍由聖保羅轉移到利斯菲後，就有300個球迷喺酒店熱情守候，尼馬更大把女圍心情靚到爆，而且森巴兵上星期六留喺酒店做Gym、玩水叉足電，尋日操練又開放畀球迷參觀，贏晒民心肯定大把人撐。

雖然中場甘素因傷冇入選，但巴西依然有王牌尼馬、射手李安度達美奧、前鋒侯克同中場盧卡斯洛迪古斯負責入波，大衞雷斯、丹尼爾同馬些路睇住後防，就算上場對南非表現令人失望，都不妨信多鋪。

今次國足搵巴西比賽，其實唔關教頭甘馬曹事，反而係贊助商促成。根據報道，贊助商睇中巴西有幾十萬華人市場，要求國足強陣鬥森巴兵，但其實班國腳十萬個唔願意老遠飛去畀人魚肉，所以中場秦升、後衞馮瀟霆同張琳芃「因傷退隊」，中場鄭智同後衞孫祥申請踢完0:1輸畀瑞典場熱身賽後又提早返國，即係話中超冠軍廣州恒大（足智彩譯名：FC廣州）得番中鋒郜林同中場趙旭日隨軍，邊似搏命？
航程迂迴辛苦過擔泥

由於仲有其他球員因傷「放飛機」，呢場國足得17個球員用，教頭甘馬曹搞唔掂班大帝，賽前話假如唔夠人，灰爆咁話自己會準備好落場。再講國足為咗慳機票錢，要先由瑞典去瑞士，然後飛葡萄牙再過巴西，舟車勞頓慘過擔完泥，咁嘅身世作客挑戰足球王國？聽炒啦！
國足對賽頻食白果

‧巴西近6場有4場至少入3球。

‧巴西近5場開4次入球單。

‧中國過去兩次對賽冇入過波。