卡維尼贏聲勢 全場爆滿嚇窒樸茨

猪拉多纳

綽號又係叫「紅魔鬼」嘅卡維尼，論規模同實力都冇得同曼聯比，之不過呢支英甲球隊亦唔野小，今晚鬥樸茨茅夫更加係創會以嚟首次坐爆主場添，氣勢咁磅礡，對住場場都要搵人嚟戥腳嘅樸茨當然可以秤先，2.7倍「讓主」抵博。（開賽時間：周日晚10:30）

新升班嘅卡維尼開咧4戰贏咗3場，球隊成績好自然多咗球迷撐，近6,000個保菲路球場座位今仗就史無前例賣晒飛，有樸茨球迷喺網上討論區傾緊點樣用高價從卡維尼Fans手上收購波飛，惹嚟當地警方高度關注，要加派人手去球場以防球迷搞事。
樸茨傷停多唔夠人用

卡維尼生力軍沙恩谷巴日前爆料，話05年因為夏利列納唔畀機會新仔，所以焗住離隊尋求發展，呢位昔日畀樸茨當垃圾嘅「通天老倌」，賽前就話倒戈要有仇報仇，呼籲主場球迷大聲唱歌嚇窒對手！

啱啱喺英錦躋身次圈嘅樸茨，有後衞保羅干洛尼鼠蹊受傷，另一守將杜姆貝耶同中場基福特亦因為出戰國際賽缺陣，翼鋒佐敦奧比達又話要停賽，領隊艾比列頓都呻排唔掂個陣，坦言猛咁借人搞到場場波都有2至3名球員處子登場，完全冇默契可言，以球隊開咧4戰失8球嘅情況嚟睇，今鋪隨時輸鑊勁畀卡維尼。