英西德只有6隊爭標！

猪拉多纳

Peter讀大學時期，有語言科教授指導本人，切忌為咗明哲保身，而講模棱兩可嘅說話，小弟永記於心。季初賽事，Peter對於各大聯賽爭標形勢未有眉目，所以不敢發言，經過兩三周比賽之後，開始搵到根據支持睇法，可以為大家展望英超、西甲及德甲。

今季三大聯賽冠軍之爭，離不開六隊。先講英超，Peter心水係曼聯、曼城及車路士，當中最睇好目前失分最多嘅曼聯。紅魔鬼將帥人才鼎盛，領隊費格遜幾有料，已經唔需要多講，球隊前場進攻鐵三角朗尼、尹佩斯及香川真司，殺傷力極強，有後勁趕上。

西甲都係屬於巴塞隆拿同皇馬之爭，前者來勢洶洶，捲土重來，關鍵在於皇馬教練莫連奴點樣扭轉乾坤，同「地上最強」再決高低，尤其係皇馬近期內部出現問題，好考莫帥領軍功力。
拜仁最有冠軍相

德甲方面，Peter認為拜仁慕尼黑可一枝獨秀，由睇佢哋季前熱身賽開始，已覺得拜仁有冠軍相，球隊前中後三線實力都有增強，後防加入丹迪、中場有查維馬天尼斯，鋒線有文迪蘇傑。而且拜仁後備力量亦相當雄厚，恐怕多蒙特難以再蟬聯冠軍，另外十六隊捧盃機會，可謂冇機會同機會渺茫。
是日金句：唔知唔講，知道即講！