丹麥誓取首「捷」

猪拉多纳

喺歐國盃表現大獲好評嘅丹麥，今晚嚟到世界盃歐洲區外圍賽B組第一擊主場鬥捷克，趁捷克中場3大指揮官齊齊打柴，丹麥大可以放心喪攻，睇怕唔難打響頭炮。特別係「曲奇兵」今仗有「中堅賓」停賽，火力隨時不跌反升，1.87倍主W值得捧場！（廣東體育周日凌晨2:15直播）

丹麥雖然喺歐國盃分組賽就玩完，但佢哋喺死亡之組砌低荷蘭，對德國同葡萄牙亦只係力戰僅敗，表現有晒交代。係，丹麥雖然有幾名老將如蘇連遜同保臣等告別國家隊，但接班人件件有料，好似曼聯門神連迪加特同天才中場基斯甸艾歷臣咁，分分鐘仲青出於藍添。
路斯基 華拉夫比拿養傷

可能大家會話前鋒賓特拿停賽，或者影響到丹麥鋒力，不過「中堅賓」新季連波皮都未掂過，狀態成疑，家陣坐波監，中鋒個位由身高達1米95嘅巨人中鋒希蘭尼斯頂上，攻擊力分分鐘仲可靠啲添！

另邊廂捷克，喺歐國盃打入8強全因佢哋喺分組賽抽籤有利，對手唔強，大家有眼見，佢哋近年青黃不接，前鋒巴路士退役，搵個接班人都冇；中場校炮同龍門打嚟打去都仲係路斯基同施治，最慘係路斯基今仗因傷缺陣，佢嘅慣常替補丹尼爾高拿同新星華拉夫比拿又一樣做埋十字兵，進攻失去重心，仲點贏波？仲有，B組個直接出線席位，講到底都係丹麥、捷克同意大利之爭，既然今仗捷克殘陣出擊，「曲奇兵」梗會趁佢病、攞佢命啦！

歐洲區B組
丹捷鬥做「細」界仔

‧兩軍近6次對賽各得1勝，4次打和。

‧兩軍近9次對賽只有2次開大。

‧捷克近3場比賽全部開細。