史雲頓怒爆奧連特

猪拉多纳

國際賽周英冠暫停，今日拿仁轉戰英甲，推介人氣風頭躉史雲頓「讓球主勝」。史雲頓主場鬥奧連特，主隊喺「熱血領袖」迪肯尼奧打造下充滿血性，連續三場作客贏唔到，更增添今仗主場爭勝決心。奧軍新季輸到慌，今場又點止輸一粒！（周六晚10時開賽）

前韋斯咸、拉素意大利球星迪肯尼奧，場上好波瀟灑唔在講，最犀利係佢有性格，感染力超強，故極得球迷愛戴，絕對係個天生領袖。上季史雲頓跌落英乙，聘得迪肯尼奧為帥，球隊極速扭轉頹勢，今季強勢回歸甲組。

雖然係升班球隊，但史雲頓一開季就打出勁旅本色，取得3勝2和佳績，近3戰作客不勝稍有跌Watt，但以迪帥好勝性格，今次主場出戰唔衰得。奧連特一開咧就做黃大仙，近期4連敗僅入1粒，陣中神射手列斯比狀態曳到連正選都冇埋，今輪輸鋪杰唔奇。
錫菲聯明恰斯肯索普

另一場英甲推介，錫菲聯作客斯肯索普贏得。斯軍傷兵名單水蛇春咁長，戰鬥力極弱。錫菲聯無論質、態都優於對手，可打開本季作客勝利之門。