蘇格蘭內亂獻細

猪拉多纳

今晚得兩場世界盃歐洲區外圍賽，其中A組蘇格蘭主場迎戰塞爾維亞最為好路，蘇軍冇選格拉斯哥流浪球員，領隊利雲又同射手史提芬費查不和，攻力大削，塞爾維亞屬守強攻弱，作客只會穩中求勝，睇嚟呢場入波唔慌多，細盤有計。另一場B組丹麥主場對捷克，兩軍對碰經常半場難分勝負，「半場和」有往績支持值得再追。

其實一睇蘇格蘭嘅大軍名單，真係冇晒胃口，今季降落丙組嘅班霸格拉斯哥流浪冇人入選，個心已經沉一沉。而剛改投新特蘭即梅開二度嘅前狼隊射手史提芬費查，因為同領隊利雲唔咬弦，被後者永不錄用，不但影響內部軍心，缺少呢名前鋒助陣，令原本入球能力麻麻嘅蘇軍，攻力進一步削弱。

塞爾維亞一向唔擅主攻，新帥米赫洛域冇選伯明翰高大中鋒施積同受傷快翼卡錫，該隊近八仗僅入三球，其中七場開細，但勝在有伊雲洛域、高拉洛夫、蘇保迪等鐵衞壓陣，防守有保證，今仗作客勢必更加保守，細盤好路。（周六晚10時開賽）
丹麥遇捷克「半場和」好路

另一場丹麥對捷克，前者有主力射手賓特拿因歐國盃期間「露底」晒菠菜公司名字一事，今場被罰停賽，冇咗入波效率高嘅「中堅賓」，中場基斯甸艾歷臣又近況欠佳，未必咬得入對手。

客軍則有進攻重心路斯基同華拉夫比拿因傷倦勤，尤其後者於邊線突破力強，係不可或缺嘅反擊利器，缺少呢位「捷克美斯」，該隊惟有以穩為先。雙方近六對碰，有五次半場未分勝負，加上進攻各有隱憂下，初段必踢得小心翼翼，呢個「半場和」值得追多鋪。（周日凌晨2時15分開賽）