瑞典強陣撐1.55倍「主勝」

猪拉多纳

今晚國足將要遠赴瑞典踢熱身賽，雖然佢哋之前僅負西班牙同賽和加納嘅表現都值得稱許，但係今次領隊甘馬曹喺傷兵滿營同備戰時間不足之下夾硬出戰，小妹實在唔睇好佢哋可以踢出水準，一於捧1.55倍「讓主」啦！

（開賽時間：周五凌晨1:00）
僅負西班牙5正選缺陣

國足今仗雖然徵召咗24人，但最後得18人出征，除咗廣州恒大（足智彩譯名：FC廣州）嘅中堅馮瀟霆有傷，張琳芃、秦升、鄭智同孫祥同樣唔踢得，而且佢哋5個都係之前對西班牙僅負0:1嘅正選，難怪領隊甘馬曹頭痕啦！更大鑊嘅係，中超喺國際賽期間居然仲有3場賽事，搞到球員勁遲歸隊，國足出發去瑞典前得1次機會齊人練波，仲只係勁Hea咁練下角球，備戰方面又只係睇咗20分鐘錄影帶就算，咁求其，輸少粒都偷笑啦！

瑞典今次都算強陣出擊，最出名嘅伊巴謙莫域、拉斯慕斯伊姆、施巴斯坦拿臣等全部在陣，雖然話班球星未必踢足全場，但係要應付殘陣兼備戰不足嘅國足，可謂綽綽有餘，睇嚟國足今鋪難逃大敗。