鹿角首回合睇定食

猪拉多纳

日本聯賽盃四強戰首回合展開，名牌球隊鹿島鹿角主場對柏雷素爾，鹿角屬日職史上盃王，歷年先後於三大賽事取得十五次冠軍，戰績一流，球隊大賽經驗非常豐富，今季聯賽爭標無望，將全力爭取衞冕聯賽盃，撞啱柏雷素爾近況低沉，鹿角有力打落水狗，平手盤捧主隊！

（周三晚6時開賽）

鹿島鹿角上季聯賽冇料到，但都撈到個聯賽盃冠軍，球會史上曾七奪聯賽冠軍，天皇盃及聯賽盃各贏四次，喺國內三大主要賽事十五次捧盃，非常威水。鹿角今季聯賽演出唔對辦，現時落後榜首仙台維加泰十三分，難望爭標，不過佢哋一踢聯賽盃就生猛晒，分組賽六戰五勝，八強戰主、客場兩勝大阪櫻花，叻到不得了！

另一邊廂柏雷素爾貴為上季聯賽王者，實力當然有番咁上下，大軍早前有過起色，一度重燃爭標希望，但踢踢吓近排又走樣，對上四戰不勝，近三場都冇士哥，前線冇晒料到，今次於盃賽場合出戰，到底能否及時回復水準，實屬一大疑問，蘇豪認為柏軍贏面唔高，現時莊家開平手盤，可秤先鹿角。
心跳小虎隊唔赦東京

另一場FC東京主場對清水心跳，心跳今季重用本土年輕人，於聯賽盃頻頻搵小將擔大旗，不過效果唔錯喎，隊中攻擊主力高木俊幸及大前元紀等表現對辦，十七歲超新星石毛秀樹亦成功上位，近日放學後更加操提升作戰狀態，成班波充滿活力，今次受讓可秤先。