史浩克夠炒奧格斯堡

猪拉多纳

今晚德國波黑柴心水有兩熱兩冷，其中一場熱門雲達不來梅，已經請到多年來偶像Oliver喺歐陸連線同大家分析，喺呢度主力講另一隊史浩克04，今晚主場鬥奧格斯堡勝望極濃，兩隊可以玩條主Ｗ二串一，單頭史浩克「讓球主勝」都有得諗。（周六晚9時30分開賽）

史浩克上仗作客賽和上季主場不敗嘅漢諾威，計全場表現同機會仲喺主隊之上，表現對辦，中場小將賀治比同達斯拿演出都有驚喜，成為箭頭亨特拉爾嘅強力支援，雖然另一大將法芬喺操練中受傷，今場未必可以復出，但球隊啱啱得到巴塞隆拿嘅荷蘭國腳阿費利加盟，主場迎戰狀態低沉兼陣容不整嘅弱旅奧格斯堡，係打開勝利之門嘅黃金機會。
德乙冷敲辛特侯遜

除兩熱外，黑柴今晚亦鍾意兩冷，其中係德甲嘅弗賴堡，自從上季中由「神奇教頭」施特賴希接手後簡直脫胎換骨，開季首仗賽和緬恩斯演出亦對辦，今仗作客面對未弗嘅利華古遜有力搶分。

另一場冷門轉戰德乙，辛特侯遜作客聖保利（周六晚7時開賽），兩隊評級同表現完全不符，聖保利名氣大踢得差，至今三戰未開齋只入一球，相反辛特侯遜由季前熱身賽爆冷贏緬恩斯開始，表現一直有驚喜，聯賽一勝兩和保持不敗，德國盃大炒科特布斯，除咗防線表現出色外，前線喺主力射手杜尼受傷長抖後，表現竟然更出色，法蘭朗寧同贊費沙合作之佳超乎想像，佢哋亦充滿野心，啱啱簽入凱沙羅頓天才球員安祖活頓，今場2.6倍「讓球客勝」，甚至6倍客Ｗ都有得博。