德乙「雙科戰」玩大佢

猪拉多纳

德國波節奏明快又多入波，好睇刺激唔會輸蝕畀英超！球彩台今屆引入「德乙」直播，開賽時間靚絕，一條龍由周六凌晨零時，直落踩到兩點半「德甲」直播，星期五晚都可以飲住啤酒食住腸，邊睇邊玩整番條德國特式二串一，認真夠爽！

科隆上屆踢得差強人意，縱有前鋒普多斯基亦單天難保至尊。講真，科隆踢波我一定唔係場場睇，但每次睇都見到佢哋班後防犯低級錯誤。小妹一直心諗：「唔係咁都可以踢德甲呀？」最終佢哋咪要直接降班囉！

科隆依家落到德乙繼續沉淪，踢咗三場聯賽只攞到一分，排緊尾二！開咧四場都有失波，證明佢哋根本冇改善過後防。今晚希望靠主場之利，加上對手科特布斯今季作客時後防同樣極不穩陣，前線鄭大世同湯馬士布卡係時候要交功課喇！

科特布斯曾經都係德甲分子，降班後喺德乙尚且保得住前列位置，開季聯賽成績不俗，辛洛高呢個科特迪瓦高大前鋒更加係鴻運當頭，新加盟後連入三球，同班隊友已經踢出默契！中場艾隆雖然身材唔高，但以腳法搭救，係球隊爭勝武器之一。不過要留意客隊今季連同德國盃在內，兩場作客不勝兼失五球全開入球大，似乎作客時防守特差。
科特布斯周五「大」解放

翻查過去三輪周五德乙，每晚三場波都有兩場開大，當中科特布斯於周五出戰都大過兩次，小妹認為呢個數據值得參考呢！（有線64及204台周六凌晨零時直播）

另外今晚場歐洲超級盃車路士對馬德里體育會，我就會開住「有線寬頻網站」www.i-cable.com或者用「joemud做乜」App喺電腦免費睇實！兩隊開季同樣上力，小妹決定撐一注入球大！
阿Kit推介

科隆 Vs 科特布斯 入球大