緬恩斯心急下格殺令

猪拉多纳

德甲獨腳戲緬恩斯主場對格雷特霍夫，緬恩斯一向習慣季初火速搶分，目前狀態已到位，主場可勝未Ready嘅新軍格雷特霍夫，今場馬會開讓球盤，緬恩斯讓半一，上盤有2.17倍超高水值得一試。

（有線64及204台周六凌晨2時30分直播）

黑柴好欣賞緬恩斯教練杜曹，呢位少帥既勤力又有創意，亦和藹可親，深受各方愛戴，佢入主緬恩斯三季，成績同表現並唔比球會前主帥，今日喺多蒙特獲得成功嘅高普差。杜曹領軍有兩大法寶，其一係大輪換奇招，場場正選都換五、六個，等對手難以捉摸，而佢同球員關係好，球員都唔介意輪流坐冷板，反而更加努力訓練，爭取出場機會，令球隊維持良性競爭氣氛。

至於杜曹另一絕招，係季初急攻，前季緬恩斯創下開季7連奇迹，上季頭兩場都贏晒，再數番大前季，頭7場亦取得4勝2和1負佳績。德甲中下游球隊實力接近，早着先鞭當然有着數。今季緬恩斯首仗作客面對進步神速嘅弗賴堡，上半場佔盡優勢，但下半場開波冇耐先失一球，最終追番和表現算唔曳，睇狀態已經到位。
格雷特霍夫未適應節奏

格雷特霍夫歷史上首次升上德甲，計班費亦排尾二，當然錢唔係一切，班費最奀嘅杜塞爾多夫聯賽首戰作客都可以爆冷贏波，但格雷特霍夫較早前德國盃畀丙組仔奧芬巴克淘汰，聯賽首戰主場吞拜仁三蛋亦毫無脾氣，教練畢斯簡斯賽後只大讚對手太超班，球隊仲未適應德甲節奏，作客睇低一線。