喜鵲啄爆艾杜美圖斯 柏杜落必勝柯打

猪拉多纳

除咗利物浦之外，另一支英超球隊紐卡素今晚歐霸盃都喺主場出擊，恭候希臘嘅艾杜美圖斯。「喜鵲」首回合作出9個變動之下同對手打成1:1，今晚返到聖占士公園，領隊柏杜賽前落咗必勝「柯打」，睇怕艾杜美圖斯都係凶多吉少，捧1.9倍「讓主」。（開賽時間：周五凌晨3:00）
艾杜美圖斯主將踢唔掂英冠

為咗留力鬥車路士，紐卡素上星期造訪艾杜美圖斯場波面目全非，最終靠賴恩泰萊嘅罰球逼和對手1:1。「喜鵲」嚟緊周日嘅英超對手只係阿士東維拉，照計喺今晚關鍵嘅次回合唔會太玩嘢，預料約拿斯古迪利斯同柏比斯施斯呢啲主力都會擔正，人腳比首回合齊整。

仲有喎，柏杜都知隊波今季個頭開得唔靚，所以已經落咗「柯打」，要求手足連贏艾杜美圖斯同維拉，鬥心唔需要懷疑。對家艾杜美圖斯喺希臘就蝦蝦霸霸，但如果連昔日喺英冠都站唔住腳嘅尼查斯古基都可以擔正，你就知呢班波係幾弱雞，今晚造訪聖占士公園輸少球都偷笑啦！

首回合：紐客和1:1