士砵亭新兵質佳 里奧艾維主力打柴

猪拉多纳

o趙私房菜

葡萄牙傳統勁旅士砵亭上季做梗頸四，球會上下當然唔想重蹈覆轍，教練沙賓圖已經講明今季目標至少入前3，季前仲「柯打」高層開水喉掃咗批經驗豐富嘅好嘢返嚟添，今晚對住里奧艾維呢道「私房菜」睇嚟實食冇黐牙，捧2.02倍「讓球主勝」。（開賽時間：周二凌晨3:15）
近6次主場對賽贏晒

士砵亭喺首輪葡超同甘馬雷斯互交白卷，今晚返到主場點都要做番齣好戲，幾位新兵守將保拿奴斯、翼衞柏拉積同中場謝臣費南迪斯都喺歐洲頂級聯賽撈過，兩位阿根廷生力軍包括中堅馬高斯盧祖同前鋒維奧拿亦係好波之人，難怪教練沙賓圖日前受訪嘅時候雄心壯志，預計新季可以攞到70分。

之所以話里奧艾維係士砵亭嘅「私房菜」，皆因士砵亭對上6次主場面對呢支弱旅都贏晒，當中仲有3次嘅贏波球差係兩球或以上。雖然里奧艾維前鋒伊斯美干卡維斯尋日向《球報》發表勝利宣言，話有信心可以締造爆冷戰果，但呢班波上季都只係僅僅護級成功，門將拉法同前鋒奧巴迪爾亦因傷唔出得，憑咩同人鍊呀？