馬體會畢勝無歸

猪拉多纳

新一季西甲繼續有「超級星期一」上演，今晚仲有場馬德里體育會主場大戰畢爾包嘅歐霸盃決賽翻版戰。原本兩隊勢均力敵，弊在畢爾包兩大主力洛蘭迪同查維馬天尼斯扭計轉會摧毀軍心，作客唔似惡得出樣。撞啱馬體會射手法卡奧講明要挑戰美斯同C朗嘅入球紀錄，今晚點衰得呀？（now632台周二凌晨4:00直播）
畢爾包棄用雙雄損實力

上季畢爾包拎到歐霸盃同西班牙盃亞軍，超額完成球迷當然開心，可惜中鋒洛蘭迪同中場查維馬天尼斯上位後，分別表態想去英超同德甲搵大錢，無心戀戰自然唔會受重用，教練比爾沙喺開咧戰同歐霸盃當佢哋走咗咁，兩個反骨仔連後備都冇份。雖然新兵阿度里斯剛啱喺歐霸盃對赫爾辛基梅開二度，但佢轉會冇耐，邊有咁易做到救世主。
馬體會財困法卡奧博跳船

主隊馬體會有迪亞高借用期滿離隊，伊度亞度沙維奧、保羅阿辛卡奧、法蘭梅里達同艾華路杜明基斯分別轉會，失血情況都幾嚴重。加上據講馬體會向波圖收購射手法卡奧尾數未清，假如對方告上歐洲足協，佢哋就會被禁買人，所以馬體會賣人籌旗後，除咗提升新人，只係以免轉會費形式簽入費倫巴治中場安利、波圖中場基斯甸洛迪古斯同基達菲後衞丹尼爾戴亞斯，勉強補充實力迎接新球季，可惜今季至由B隊上嚟嘅21歲後衞基達，早兩日練波撞斷鎖骨，今場肯定摺埋。

可能法卡奧知道唔對路，最近話自己有條件同美斯、C朗爭西甲神射手同歐洲金靴獎，擺明想趁馬體會沉船前搵間大球會落腳。要知道法卡奧係連續兩屆歐霸盃神射手，上屆馬體會喺決賽以3:0打爆畢爾包，佢就梅開二度，近2次對賽勁入4球，今晚再交鋒仲唔係靠晒佢！
馬體會主場威力勁

‧馬體會上季主場全西甲第4，19戰僅負3場。

‧雙方近10次對壘勝負各半。

‧近5次對賽有4場總入球都係3球
信往績博3球總入球

馬體會由熱身賽至今7戰有4場開大，畢爾包今季4場正式賽事亦全部開大，相信今晚兩隊碰頭好大機會出現3個或以上入波。睇翻往績，兩隊波近5次對賽就有4場總入球係3球，而且仲連開咗3次呢個總入球數。有呢兩個數據支持，今晚一於大膽啲，博3.7倍3球總入球。