士砵亭遇魚腩發維

猪拉多纳

葡超獨腳戲士砵亭主場對里奧艾維，士砵亭近兩場比賽表現一般，喺葡超及歐霸盃外圍賽都未能取得勝利。不過，球迷唔好咁快就睇小呢支里斯本球隊，今次遇到魚腩里奧艾維，士砵亭有力大捷，「讓球主勝」大可優先考慮。

（周二凌晨3時15分開賽）

士砵亭近兩場都要作客，未能取勝可以理解，今次終於返到主場比賽，對於球員士氣會有好大幫助。留意到對賽往績，士砵亭近幾次主場對里奧艾維都有好表現，當中更曾以大比數取勝，相信今場士砵亭一樣可以輕鬆姿態擊敗里奧艾維，「讓球主勝」有2倍以上捧得過。其實里奧艾維上季幾乎降班，如非費倫斯唔爭氣，里奧艾維未必可以留守葡超。今場撞正「Big3」球隊士砵亭，里奧艾維冇運行咯。
華拉度列讓唔起利雲特

至於西甲華拉度列主場對利雲特，華拉度列屬升班球隊，戰鬥力有待證明，勿因主場之利就過分樂觀，計級數今場讓唔起利雲特，「讓球客勝」有望開出。最後一關德乙奧厄主場對科隆，主W值得留意。自從王子普多斯基離隊改投阿仙奴之後，科隆實力亦明顯下滑，預料奧厄可憑主場之利痛擊對手。