華倫圍剿拉科

猪拉多纳

今晚西甲尾場華倫西亞主場對拉科魯尼亞，絕對係「那些年的西甲大戰」！早喺十幾年前，呢兩隊都有能力阻止兩大班霸皇馬同巴塞捧盃，更加係歐洲賽嘅常客。不過時移世易，相信家陣只有華倫仲有能力去做攔路虎喇，呢場華倫對住光輝不再嘅拉科，求好分就梗係要2.05倍「讓球主勝」啦！（now632台周一清晨5:00直播）

華倫首輪西甲作客皇馬和波離場，「蝙蝠兵」喺落後嘅劣勢下唔放棄，一直搏到完場嘅鬥志同精神，實在值得一讚，亦證明咗呢班波嘅戰鬥力唔錯！今仗華倫回師主場出擊，相信係時候要打開勝利之門喇，雖然中場皮亞堤病咗、中堅阿爾拉米練波嗰陣又整傷腳，但華倫班人只要踢番上場對皇馬嘅水準，簡拿利斯為隊友製造攻門機會，蘇爾達杜喺禁區內嘗試起腳攞分，仲有加高同艾比達後上，絕對有本事搞到拉科門前風聲鶴唳，入波應該只係時間問題。
折墮拉科冇野心

由昔日嘅歐聯常客，到受財困淪落到喺前季要降班，拉科魯尼亞雖然上季奪得西乙冠軍，但睇番呢隊波今時今日嘅規模，「張峰」真係好擔心佢哋會做「升降機」囉。拉科話就話剛啱簽咗Vodafone做贊助，但係佢哋季前未有水喉射住嗰陣冇錢增兵，同10年前一樣都用緊37歲嘅華拿朗，即使佢哋之後有錢買人，但都係之後嘅事啦，今場用地莊人腳仲要作客華倫？輸少當贏啦！
張峰來料：華倫西亞（讓球主勝）