韋根起步發軟蹄 猛火聖人有力開齋

猪拉多纳

修咸頓新升班，韋根上季僅護級成功，兩隊實力唔會差得遠，今晚兩軍碰頭一定打甩髀。睇番首輪表現，兩隊都係同強隊對壘，修咸頓作客曼城差少少製造出爆冷賽果，表現令人驚喜，今晚一於支持修咸頓主場打開勝利之門，全取三分。（有線202及302周六晚10:00直播）

修咸頓對上一次喺英超角逐已經係04至05年度球季，上季憑住不俗嘅攻擊力，以第2名取得直接升班資格重返英超。但始終英冠同英超嘅節奏強度有一定差別，開頭都對「聖人」Keep唔Keep得住進攻火力有疑問，不過經過首輪比賽，作客上屆聯賽冠軍曼城都可以取得兩個入球，就知唔使擔心，話唔埋會成為另一隊史雲斯，為球迷帶來驚喜。
韋根季初病嚴重

近幾季韋根都能夠喺季尾發力，成功護級，睇落好似韌力十足，但係掉番轉頭諗，亦證明佢地季初病係何等嚴重。加上今季嘅陣容有出無入，令原本毫無星味嘅陣容更加平庸，任憑馬天尼斯點樣出盡法寶，今晚作客修咸頓睇怕都要掉低三分。
張峰來料：修咸頓（勝）