法語4俠無懼藍戰士 拆車方程式

猪拉多纳

有錢係萬能，無錢亦可以有無限可能！今晚英超車路士主場對紐卡素，車仔點豪唔使講，反而紐記使錢使得精明，今夏無乜收購，繼續靠巴亞、施斯、賓艾化及卡比耶合組「法語搶分方程式」，豪門見到都驚啦！難怪佢哋作客對賽竟然食住車仔，4戰2勝2和贏晒盤，今場紐記受讓，小弟撐2.72倍「讓球客勝」啦！（有線200及300、廣東體育周日凌晨0:30直播）

車路士季前重金收購夏薩特同奧斯卡杜斯山度士兩大進攻中場，加埋原有嘅桑馬達、林柏特，部部都係超級發電機，牌面係幾勁，不過小弟認為車仔冇咗杜奧巴呢架坦克撞開對手防線，對住實力唔曳嘅球隊，係咪齋靠中場就可以「扭」出個未來呢？
車仔進攻中場多防線弱

事實上，「藍戰士」多年嚟習慣咗用杜奧巴最耍家嘅簡單進攻模式，一腳波斬上去湧，家陣突然變「弱版巴塞」靠扭、傳劏開對手防線，短短一頭半個月根本冇可能適應到。大家有眼睇，車仔周中對住雷丁，就係中場太多進攻型球員，第一道屏障做得唔好，班守將靠唔住之餘，仲連施治都犯埋低級失誤，呢架「戰車」真係勁多問題！
紐卡素4訪史丹福不敗

對家紐卡素就唔同喇，佢哋上星期贏熱刺個正選名單，全部都係上季班底，丹巴巴亞同柏比斯施斯呢對塞內加爾箭頭固然夠弗，就連一對法國中場卡比耶同賓艾化亦着晒火，有「法語4俠」壓陣，睇落唔會差過車仔囉！而且最重要一點，係紐卡素近4次造訪史丹福橋係2勝2和，堪稱「煞車高手」，今鋪繼續受讓，有乜可能唔捧場？題外話，小弟睇過紐記新兵安尼達嘅表現，呢位荷蘭中場潛質極高，好大機會係另一個精明收購，真係要寫個「服」字畀柏杜喇！
頂占筍盤：紐卡素（讓球客勝）

近10次對賽旺半場細

‧近10次對賽「半場大細」共開3大7細。

‧對上2季4次對碰開出2場和波，其餘2戰均由作客一方勝出。

‧連聯賽及英聯盃在內，紐卡素近4次作客車路士，錄得2勝2和不敗佳績。