保頓為梅姆巴打甩「比」

猪拉多纳

英冠開咧後即刻開快車，保頓今晚喺主場對打比郡，1.57倍主W熱都要捧！雖然保頓降班後首戰淨吞般尼兩蛋，不過梅姆巴因為心臟問題被迫24歲掛靴，肯定會激起班隊友嘅鬥心，領隊奧雲高尼同隊長奇雲戴維斯更分別話會為梅姆巴而戰，返主場當然打甩「比」！（開賽時間：周三凌晨3:00）
蠱惑打比郡2場失7粒

悲情降班嘅保頓，主力流失情況唔算嚴重，仲簽到西布朗嘅愛爾蘭國家隊中場安祖斯。同時，南韓翼鋒李青龍抖足成季已好番，開咧戰都有份打正選，不過保頓除咗降班令人心痛，仲有死過翻生嘅中場梅姆巴，最後都接受醫生建議提早退役，消息傳出後保頓以0:2不敵般尼，呢場點可以再衰？

對家打比郡喺聯賽盃半場領先3球，最尾竟然同斯肯索普踢成5:5，仲衰到喺互射12碼輸埋出局，日前喺開咧戰主場領先兩球，結果又畀錫周三逼和2:2完場，睇落非常蠱惑，就算射手泰臣連續兩場入波都信唔過，講到底打比郡開季兩場失7球，火力幾強都嘥氣啦！